أفضل أشعار الفاجومي المصري أحمد فؤاد نجم
قد يكون الشعر عند البعض ما هو إلا كلام قد يكون الكثير منه غير مفهوم ولذلك لا يؤثر فيه ولا يخطر له بال أن يقوم بقراءة هذا الشعر ، ولكن عندما يكون الشعر باللغة العامية واللغة الدارجة ويكون معظمه مسرود بطريقة كوميدية خفيفة بالتأكيد سوف يكون هناك فرق كبير ، لذلك تمتع الشاعر المصري العبقري أحمد فؤاد نجم طوال رحلته الأدبية في كتابة الشعر أن يقدم للجميع صورة مختلفة للشعر ، أحبه الكثير خاصة لجراءته وشعره الغير ممل والغير متكرر ، فعندما تقرأ له قصيدة لابد وان لا تفارقك الابتسامة وربما تخرج منك صيحات الضحك ، عاش طوال عمره يكتب أشعارا في كافة المجالات وخاصة السياسة التي أضرت به كثيرا ، ابن محافظة الشرقية أبن ضابط شرطة وهو أخ لسبعة عشر أخ وأخت ، ومن بعد وفاة والده التحق بملجأ أيتام في الزقازيق وهو نفسه ملجأ الأيتام الذي جمعه بالفنان عبد الحليم حافظ في التربية والنشأة ، سمي ولقب بالفاجومي وقدم روائع شعرية فريدة للغاية خاصة مع رفيق الدرب الشيخ إمام ،وهي التي سوف نقوم الآن بعرض جزء منها خلال السطور التالية .
قصيدة الخط دا خطي
الخط ده خطّي .. و الكلمة دي ليَّ
غطّي الورق غطّي .. بالدمع يا عينيّ
شط الزتون شطّي .. و الأرض عربية
نسايمها أنفاسي .. و ترابها من ناسي
و إن كنت أنا ناسي .. ما حتنسانيش هيّ
الخط ده خطّي .. و الكلمة دي ليَّ
لاكتب على عيني .. يحرم عليكي النوم
و احبس ضيا عيني .. بدموعي طول اليوم
قبل الوفا بديني .. زَي الصلا و الصوم
ده الدين في عُرف الحر .. هم و مذلة و مر
و هموم تجيب و تجُر .. أحزان مخبِيَّة
لاكتب على كفي .. و الحبر من دمي
يا عِزوتي كفي .. يا همتي ضمي
أول ما حنوَفي .. بالوعد حنسمّي
باسم اللي ماتوا صغار .. في المدرسة و الدار
و المصنع اللي انهار .. فوق الصنايعية
الخط ده خطي .. و الكلمة دي ليَّ
قصيدة أنا مبخفش
أنا مابخفش وحفضل أقول
كلمة حق عليها مسؤول
إن الريس راجل طيب وبشعبه دايماًَ مشغول
مشغول إنه يلم فلوسهم
بره سويسرا يحوشهلنا
وف حسبات سريه يشلها …..نفسه يأمن مستقبلنا
شفتوا إزاي بقه قلبه رحيم
عنده إيمان وضميره سليم
بيجوعكوا لجل تخسوا
آه يا شعب محتاج لرجيم
من جهلكوا بتقولوا بطاله
وإن الأحوال مش شغاله
دا الراجل نفسه يريحكم
هي الراحه تبقي عواله ؟؟
أما حكاية المنتجعات
ليه بتسموها معتقلات ؟؟؟؟
ليه الظن…… وسوء النيه
نفسه يفسحكوا يا بهوات
أما الكرسي واللى تقال
دا كلام مش محتاج لسؤال
الغلطه دي غلطتنا يا عالم
إن مجبناش كرسي تيفال
والله إنتوا ظالمين الراجل
ضيع عمره ومين يستاهل
حتى الأكل بيكله بدالنا
طالع واكل نازل واكل
ماله الريس بعد دا كله ؟؟؟
قصيدة نويت أصلي
نويت اصلي صرصور دخل لي
هر شلي مخي قعدت افلي
وشوشني قلي شوف القزازه
فيها اللزازه دوقلك شويه ياانت يلي
مصمص شفايفك ماحد شايفك
ومزمز بكاسك روق تمللي
فضلت أفكر اسكر ما اسكر
الله اكبر الفجر بان لي
حليت رباطي من تحت باطي
لا قدرت اطاطي ولا طلت اعلي
صرصور شيطاني قفل وداني
مااقدرش ياني رويتلي غلي
حيران ياحالي سهران ليالي
وسنين بقالي مربوط ف ضلي
وسألت قال لي شيخنا المصلي
اركع ترتا اسجد ترللي
يارب ياللي يارب ياللي
زرعت عودي سارح تمللي
وعدلت ضهري على سرج مهري
وطبعت زهري على خد خللى
وحياه ماعشقي متعب ومشقي
مهمن جرالي مهمن حصل لي
لاوهب حياتي واوصل صلاتي
والآتي آتي ف يوم تجللي
قصيدة الخواجة الأمريكاني
الخواجه الامريكانى
والسماسرة اللى وراه
تخنوا بالكدب ودنه
وعرضوا له مقاس قفاه
فهموه
من غير ما يفهم
ان سوق الشرق مغنم
والخوجه بطبعه مغشم
والمصاري معفرتاه
حب يعمل فيها تاجر
وانطلق
يسلب وينهب
ف الزباين بالنهار
يحدف الدولار يلمه
تلتميت مليون دولار
بالقزايز والبنات
باللبان
والبمبونات
بالمدافع والدانات
او بأفلام الرعاة
قول بقي تاجر وفاجر
وانفلت لص المواشي
رعب ماشي فى البلاد
يشفط البترول ويطرش
كل الوان الفساد
عزرائيل من غير فرامل
يقلب العرسان ارامل
حتى فى بطون الحوامل
كان بيدبح الحياة
بالسناكي والخناجر
والنهايه يا خواجه
مش ف يوم كانت بدايه ؟
البدايه برضه لازم
ييجي يوم
توصل نهايه
مهما زاد الراسمال
الهلاك هو المآل
والتاريخ
هو اللى قال
لعبه الموت فى الحياة
تسحب الروح م الحناجر
موال الفول واللحمة
عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول
غنوة السلام
لو بدينا بالسلام
يا سلام
قد ايه الروح تميل
و النغم يطلع جميل
و الوتر يوصل كلامه
للقلوب صافي و أصيل
قد ايه
و قد ايه
بس اقول ايه
و لا ايه
السلام دا كلمة خضرة
السلام
بيحب نوره
و شوفوا نوره تبقى مين
قد ايه القلب يعشق
لو سمع غنوة سلام
يا سلام
قد ايه الغنوة تحلا
زي أوراق الريحان
ترتوي منها الشفايف
لما ينطقها اللسان
زوقوك الناس يا دنيا
بالكلام
عن السلام
و الكلام
غير الحقيقة
و العمل
غير الكلام
يا سلام
من هنا نبدى الكلام
يا صبابة يا مغرمين
كلنا نحب السلام
و السلام يحب مين ؟
قصيدة كل ما تهل البشاير
كل ما تهل البشاير
من يناير كل عام
يدخل النور الزنازن
يطرد الخوف
والظلام
يا نسيم السجن ميل
ع الشجر وارمي السلام
زهر النوار
وعشش فى الزنازين .. الحمام
من سكون السجن
صوتي
نبض قلبي
من تابوتي
بيقولولك يا حبيبتي
كلمتي
من بطن حوتي
سلمى لي ع الحبايب
يا حبيبتي
سلمى لي
كل حب
وله نصيبه من سلامي
بلغي لي
احضنى العالم عشاني
بين عيونك
وابعتى لي
نظره
منها اشوف حبايبي
واشفي قلبي
واساليلي
كل عالم فى بلدنا
كل برج وكل مادنة
كل صاحب من صحابنا
كل عيل من ولادنا
حد فيهم شاف علامه
من علامات القيامه
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها
نومه
تلعن الجوع والمذله
والمظالم
والحكومه ؟
سلمى لي ع الولاد السمر
خضر العمر
فى عموم الحواري
سلمي لي ع البنات
المخطوبين فى المهد
لسرير الجواري
واساليلي بالعتاب
كل قاري فى الكتاب
حد فيهم
كان يصدق
بعد جهل
بعد موت
ان حس الشعب يسبق
واي صوت
هى دي مصر العظيمه
ياحبيبتي
هى مصر
اللي فضلتى ف هواها
عشنا
على الف قصر
هى دي يا عزة
مصر
قصيدة المرجيحة
يا عم ادريس
ياعم ادريس
يا بو المرجيحه والقواديس
ما جاش الدور ؟
عشان يطلع قادوسي لفوق
أبوس النور وأطفي لعلالي شوقي
وأغنى فى الهوي موال
على ورد الخدود والخال
وادوق الحب سحر حلال
وأشوف الدنيا
وأبقي عريس
ياعم ادريس
ياعم ادريس
ياعم ادريس على الدور
أدور وأطلع مع الطالعين
كفايه سنين ياعم ادريس
ياعم ادريس
كفايه سنين
وأنا وعيال
كما العصافير
رفاقه كلنا وفرافير
يا دوب يعلا الجناح بينا
يعدينا القادوس ويطير
ونرجع تاني لأفراحنا
ولا عرفنا الطريق من فين
وجينا
زي ما رحنا
حياري ومحرومين لاتنين
نداوي بالغنا جراحنا
ونرمي اللوم على الجناحين
وجرح النفس له وجعين
يبكي القلب
قبل العين
وقاضى الحظ له شرعين
لاهل البخت … والمتاعيس
ياعم ادريس
ياعم ادريس
وآه لو بختنا يشوفنا
ونرمي الزهر يدينا
وقاضي الحظ ينصفنا
ويحكم بالامل لينا
ونتمرجح على كيفنا
وينساب القادوس
بينا
يا خدنا بعيد ويحدفنا
وعند الشمس يرمينا
على بحر النسيم نسبح
وتسرح فيه أمانينا
وفوق شط النجوم ننزل
وترسي هناك مراسينا
ويبقي الجو هليله
تلعلع فيه
غناوينا
ونبدر
فى الفضا حبه
غناوي
كلها محبه
تقول للهم يتخبي
وترقص فى الهوي الفوانيس
ياعم ادريس ياعم ادريس
قصيدة رسالة إلى السجن
حبيبي يا مجرم يا سافل
يا دون
يا رب السوابق
يا رد السجون
رزالتك معاهم
ونمك عليهم
دا زائد جنانك
ونعم الجنون
جابولي وجابولك
وياما يجيبوا لنا
لان البلد دي
حاكمها القانون
توقع ما بينى وما بين
الحكومه ؟
دي برضك حكومه
وأنا إيش أكون
أديك رحت مورته
وحتروح بشرطه
وحيفسحوك
فى جميع السجون
وأنا مش ح أزورك
كما كنت فاهم
ولا كنت فاهم
ولا يحزنون